Meethay aur Laal Tarbooz ki pehchan ke 5 tarike

Meethay aur Laal Tarbooz ki pehchan ke 5 tarike

Tarbooz aik aisa phal hai jo pyaas aur garmi ki shiddat ko khatam karta hai. Is ka baqaida istemaal insani jald ko khobsorat aur roshan banata hai. Is mein vitamin A aur C shaamil honay ke ilawa ye Cancer aur Dil ki bimarion ke bachao mein bhi nihayat mufeed hai.

Tarbooz mein 90 % pani hota hai aur ye insani jism ko pani ki kami ka shikaar nahi honay deta. Lekin in sab se barh kar is ka zayega isi waqt bhaata hai jab tarbooz meetha aur pakka hua ho.

Meethay aur laal tarbooz ki pehchan

Aap tarbooz kharedtay waqt is ke tukre ko dekh kar is ke meethay honay ka andaza lagatay hon ge lekin is ke bawajood bhi agar ye pheeka nikal aaye to phir maza kirkira ho jata hai.

Tarbooz khareedna kisi riski sarmaya kaari se kam nahi hai, kyunkay ye aam tor bohat barray hotay hain aur agar phal farosh kaat kar na dukhaay to janna lag bhag namumkin hota hai ke ye andar se kaisa hoga.

Agar aap meetha aur pakka hua tarbooz khareedna chahtay hain to un chand cheezon ke baray mein jaan len. Is se aap ko tarbooz katay baghair hi pata chal jaye ga ke jo tarbooz aap khareed rahay hain wo andar se kitna laal aur meetha hai.

1. Tarbooz ke wazan ka mawazna

Agar aap tarbooz ko uthayen aur wo bohat wazni mehsoos ho yani dekhnay ke muqablay mein ziyada bhaari mehsoos ho to samajh len ke aap ne durust phal ko intikhab kya hai. Tarbooz ko haath mein utha kar is ka wazan kar ke tasalii karen ke is ka wazan is ki jasamat se ziyada hona chahiye.

Is ke liye aap ain isi jasamat ke dosray tarbooz se bhi mawazna kar saktay hain. Ab jo phal jitna wazni aur bhaari hoga itna hi wo meetha aur tayyar hoga. Isi usool ko dosray phalon ke liye bhi aazmaaya ja sakta hai. Tarbooz jitna wazni hoga itna hi ziyada acha honay ka imkaan hai.

2. Tarbooz ki satah hamwar aur golai yaksaa ho

Tarbooz ki satah hamwar aur golai yaksaa ho

Khayaal rahay ke tarbooz hamwar aur yaksaa golai ke sath ho aur is par koi khaas nishaan, kat ka nishaan aur kahin se bhinja hua na ho. in nishanaat aur ghair-hamwar satah ka matlab ye ho sakta hai ke numoo ke douran tarbooz ko achi terhan sooraj ki roshni nahi mili hai

jis ka matlab hai ke phal mukammal tor par pakka hua nahi. Aur tarbooz ko kaasht ke douran pani ki achi miqdaar nahi mil saki hai. Is liye koshish karen ke sirf aisa hi tarbooz khareedain jo hamwar aur yaksaa golai wala ho.

3. Tarbooz par peelay dhabbay ka nishaan

Tarbooz par peelay dhabbay ka nishaan

Meethay aur laal tarbooz ki pehchan, tarbooz per peela dhaba
Tarbooz zameen par rakhay hotay hain aur wahein pkte hain lekin jo hissa zameen ko choota hai wo halka ya bohat gehra peela ho sakta hai usay field spot bhi kaha jata hai. Is jagah dhoop na pounchanay se ye hissa mukammal tor par to sabz nahi hota lekin halka aur gehra peela zaroor hojata hai.

Kisi tarbooz ke pakay aur khanay ke qabil honay ki sab se barri nishani is par mojod aik nishaan ya dhabba hota hai. Isi liye ye dhabba jitna gehra hoga phal itna hi meetha hoga. Taham agar ye nishaan zardi mael sabz ya safaid ho to is ka matlab hai ke ye tarbooz khanay ke liye abhi pakka nahi.

4. Tarbooz ki rangat

Tarbooz ki rangat

Tarbooz ki rangat gehray lekin kam chamkeeli yani bhadi honi chahiye. Agar aisa hai to tarbooz intehai meetha ho ga. Aur khanay ka maza dobala ho jaye ga. Basorat deegar paison ke zaya ke kuch na haath aaye ga. Is liye tarbooz kharedtay waqt is ki rangat ko zaroor mad e nazar rakhen.

5. Tarbooz ko baja kar dekhna

Tarbooz ko baja kar dekhna

Tarbooz ko lainay se pehlay halkay se haath se baja kar dekhen aur agar wo aawaz karakht ya kisi cheez ko thonknay jaisi lagey to is ka matlab hai ke tarbooz abhi kacha hai is liye usay mustard kar dein taham agar ye aawaz aisi ho jaisay taron ko cheda gaya ho to aise tarbooz ka intikhab kar len.

Agar tarbooz in paanchon (5) teston mein kamyaab ho gaya. to Insha Allahsurkh, meetha aur zayega se bhar-poor hoga.

Meethay aur laal tarbooz ki pehchan ke hawala se agar koi cheez aap ki samajh mein nahi aayi hai ya aap is tehreer ke hawala se mazeed maloomat haasil karna chahtay hain to aap hamein comments kar satke hain. Aap ke har sawal, har comments ka jawab diya jaye ga.

Agar aap ko ye tehreer achi lagi hai to aap usay social media par share kar satke hain. Taakay aap ke dost ahbaab ki bhi behtar tor par rahnumaiye ho sakay.