Mein Aap Ka Nokar Hon Baingun Ka Nahi

Aap Ka Nokar Hon Baingun Ka Nahi

Aik badshah ka wazeer bohat khushamdi tha. Badshah jo bhi kehta wazeer foran is ki taieed karta. Aik din badshah ne kaha, “baingun bohat achi tarkari hai.”

Wazeer kehnay laga, “sarkaar, baingun ke kya kehnay hain. Zaiqay daar, khobsorat. Tarkariyon ka badshah hai. Hakeemon ka kehna hai baingun kayi bimarion ka ilaaj hai.”

Aglay din badshah kisi aur mood mein tha. Badshahon ka to yahi hisaab hota hai ke pall mein mashah pall mein tola. Kehnay lagey, “baingun buri tarkari hai.“

Wazeer ne foran haan mein haan malai aur bola, “g huzoor, baingun bhi bhala koi tarkari hai. Kala mun hai. Na shakal hai na zayega. Hakeemon ka kehna hai ke baingun khanay se khoon mein kharabi hojati hai. ”

Badshah ne heran ho kar kaha, “kal jab mein baingun ki tareef kar raha tha to tum bhi tareef kar rahay they aur aaj meri dekha dekhi baingun ki buraiee kar rahay ho? ”
wazeer ne jawab diya, jahan panah, mein aap ka nokar hon baingun ka nahi.

Yeh sun kar badshah ne kaha tum log jee huzoori mein haq aur sach ko samnay nahi anay dete, jis ke sabab sahib iqtidaar mutaqabbir ho jatay hain aur is ke nateeja mein un se insaaf nahi ho paata. Insaaf ka qatal hi qomon ke zawaal ka sabab bantaa hai .

Yeh bhi parhiye : Aaj he to ghareebi ka maza aaya hai

Kuch der to wazeer chup raha phir kehnay laga huzoor jaan ki amaan pawon to aik arz karoon .
Badshah ne kaha : kaho, kya kehna chahtay ho ?
Wazeer ne kaha huzoor sach aur haq ki kehnay walay hamesha jaan se gaye hain .

Badshah ne kaha! Yaad rakho sach aur haq jaan se barh kar qeemti hain. Marna to aik roz hai hi, sach kehte mrw ge to baqi raho ge, haan jhoot kehnay ya is par durust ki mohar sabt karne ki soorat mein bhi zindah raho ge lekin laanat aur phatkaar is zindagi ka muqaddar bani rahay gi.

Sabaq: Is tehreer se hume ye sabaq milta hai ki g hazoori aur khushmad se waqati faida to mil jata hai lakin laanat aur phatkaar hamesha ke liye hamare maqadar mein likh di jati hai, is liye ji hazoori aur khushamad se bachna chaiye.

Agar ap ko ye tehreer achi lagi hai to ap isay social media par share bhi kar sakte hain, aur hume comments bhi kar sakte hain, shukaria.